ဝက်သားတုတ်ထိုးလုပ်စားကြမယ်
၀က်သားတုတ်ထိုးလို့ဆိုလိုက်ရင် ဝက်သားကြိုက်သူအားလုံးလိုလိုက မငြင်းဆန်နိုင်ကြပါဘူး။ ချိုချိုမွှေးမွှေးအရသာနဲ့ မုန်ညင်းပါတဲ့ဟင်းရည်ရယ်၊ ဝါးလိုက်ရင်ထုတ်ထုတ်လေးနဲ့ စားလို့ကောင်းတဲ့ ဝက်ကလီစာတွေရယ်၊ ကြက်သွန်ဖြူ၊ ငရုတ်သီးစိမ်းနံ့လေးမွှေးတဲ့ အချဉ်ရည်ရယ် အားလုံးကလိုက်ဖက်ညီလို့နေပါတယ်။ ပျော်ပွဲရွှင်ပွဲတွေအတွက်ပဲဖြစ်ဖြစ်၊ မိသားစုဆုံချိန်လုပ်စားဖို့ပဲဖြစ်ဖြစ်သင့်တော်လှတဲ့ ဝက်သားတုတ်ထိုးတစ်အိုးကို အတူတူဖန်တီးကြည့်ရအောင်လား။
ပါဝင်ပစ္စည်းများ
- ဝက်သားသုံးထပ်သား ၂၀ ကျပ်သား
- အချင်းတိုင် ၁၀ ကျပ်သား
- အူချို ၁၀ ကျပ်သား
- နားရွက် ၁၀ ကျပ်သား
- လျှာ ၁၀ ကျပ်သား
- အသဲ ၁၀ ကျပ်သား
- နှလုံး ၁၀ ကျပ်သား
- နို့အုံသား ၁၀ ကျပ်သား (အားလုံးကိုမန်ကျည်းသီးနဲ့ဆားအသုံးပြုပြီးရေဆေးသန့်စင်ထားပါ)
- အူပိတ် ၁၀ ကျပ်သား
- အူမကြီး ၁၀ ကျပ်သား (ဆား၊မန်ကျည်းသီး၊သံပရာသီးတို့နဲ့ အတွင်းအပြင်လှန်ဆေးရပါမယ်၊ သုံး လေးထပ်လောက်ထိ ပြောင်စင်အောင်ဆေးပေးပါ)
ဆေးကြောသန့်စင်ရန်
- ဆား ထမင်းစားဇွန်း ၃ ဇွန်း
- မန်ကျည်းသီး ၅ ကျပ်သား
- သံပုရာသီး ၃ လုံး
ချက်ပြုတ်ရန်
- ရှာလကာရည် ထမင်းစားဇွန်း ၄ ဇွန်း
- ကြက်သွန်ဖြူ ၅ မွှာ (နုတ်နုတ်စင်းထားပါ)
- ချင်း ၂ စင်တီမီတာ (ညက်အောင်ထောင်းထားပါ)(အရည်ပဲညှစ်ယူပါမယ်)
- ခနောကြက်သားမှုန့် လက်ဖက်ရည်ဇွန်း ၂ ဇွန်း
- ငရုတ်ကောင်း လက်ဖက်ရည်ဇွန်း ၂ ဇွန်း
- တရုတ်မဆလာ လက်ဖက်ရည်ဇွန်း ၁ ဇွန်း
- ခရုဆီ ထမင်းစားဇွန်း ၅ ဇွန်း
- ပဲငံပြာရည်အနောက် ထမင်းစားဇွန်း ၅ ဇွန်း
- သကြား ထမင်းစားဇွန်း ၂ ဇွန်း (တစ်ဇွန်းကိုအသားနယ်ဖို့နဲ့တစ်ဇွန်းကိုဆီသတ်ဖို့ သုံးမှာဖြစ်ပါတယ်)
- ဆား လက်ဖက်ရည်ဇွန်း ၂ ဇွန်း
- နာနတ်ပွင့် ၆ ပွင့်
- သစ်ကြံပိုးခေါက် ၄ ချောင်း
- ကရဝေးရွက်ခြောက် ၆ ရွက်
- ဆီ ထမင်းစားဇွန်း ၅ ဇွန်း
- ရေ ၁၂ ခွက် (၃၀၀၀ မီလီလီတာ)
အချဥ်ရည်ပြုလုပ်ရန်
- သကြား ထမင်းစားဇွန်း ၁ ဇွန်း
- ရှာလကာရည် ထမင်းစားဇွန်း ၁ ဇွန်း
- ငံပြာရည် ထမင်းစားဇွန်း ၁ ဇွန်း
- ဗမာငရုတ်ဆီအနီ ၁ ခွက်
- ကြက်သွန်ဖြူ ၄ မွှာ (ထောင်းထားပါ)
- ငရုတ်သီးစိမ်း ၄ တောင့် (ကတ်ကြေးဖြင့် သေးသေးညှပ်ထားပါ)
ချက်ပြုတ်ပြင်ဆင်ပုံ
-
ဆေးကြောထားတဲ့ အသားတွေအားလုံးကို ချက်ပြုတ်ဖို့ လုပ်ထားတဲ့ ပါဝင်ပစ္စည်းတွေ(ဆီမှလွဲ၍)နဲ့ ရောနယ်ပြီးရေခဲသေတ္တာထဲမှာ ၃၊၄ နာရီခန့်နှပ်ထားပေးပါ။ မပြုတ်ခင် နာရီဝက်ခန့်ကြိုထုတ်ထားပေးပါ။
-
အိုးထဲကို ဆီထည့်ပြီး ဆီဆူလာတဲ့အခါ သကြား စားပွဲတင်ဇွန်း ၁ ဇွန်းထည့်ပြီးနီညိုရောင်ဖြစ်အောင်ကြော်ပါ။
-
ပြီးရင်နှပ်ထားတဲ့ အသားတွေအားလုံးကိုထည့်ပြီး ၃ မိနစ်ခန့်မွှေပေးကာ အသားမြုပ်အောင် ရေထည့်လိုက်ပါ။
-
မီးပြင်းပြင်းနဲ့တည်ပါ။ ရေနည်းနည်းခန်းပြီး ဆီပြန်လာပြီဆိုရင် နှလုံး၊ အသဲ၊လျှာတို့ကို ဆယ်ထားပေးလိုက်ပါ။
-
ကျန်တဲ့အစိတ်အပိုင်းတွေကို ရေခမ်းတိုင်း ရေထည့်ထည့်ပေးပြီး ၃ ကြိမ်ခန့်ရေ ထည့်ပေးရပါမယ်။အသားအားလုံးနူးအိသွားပြီဆိုရင်တော့ ဟင်းအရည်အနည်းငယ်ချိန်ပြီး မီးပိတ်ပေးလို့ရပါပြီ။
-
အချဉ်ရည်ကတော့ အပူပေးထားတဲ့ငရုတ်ဆီထဲကို ကြက်သွန်ဖြူ၊ငရုတ်သီးစိမ်းနဲ့တခြားသော ပါဝင်ပစ္စည်းတွေရောမွှေပေးဖို့ပါပဲ။ အပေါ့၊အငန်၊အချဉ်ကို ချိန်ဆထည့်နိုင်ပါတယ်။
-
ဒါကတော့ မွှေးမွေးလေးနဲ့ အရသာလည်းရှိစေမယ့် အိမ်လုပ်ဝက်သားတုတ်ထိုးလေးပါပဲ။ အသားတွေကို မိမိစိတ်ကြိုက်အထူအပါးလှီးပြီး ဝါးတုတ်တံနဲ့ထိုးကာ အချဉ်ရည်လေးထဲနှစ်ပြီး စားသုံးနိုင်ပါပြီ။
Credit: https://www.howtocook.com.mm