ရာသီဥတု အကူးအပြောင်းကာလမှာ ကိုယ့်ရဲ့လူနေမှုဘဝပုံစံတွေမှာလည်း အပြောင်းအလဲတွေ ဖြစ်လာတတ်ပါတယ်။ အဝတ်အစားတွေ၊ စားသောက်ပုံတွေ အကုန်ရာသီဥတုနဲ့အညီ ပြောင်းလဲပစ်ရပါတယ်။

ကံမကောင်းတာတစ်ခုက ဒီလိုရာသီဥတုအကူးအပြောင်းမှာ ဖျားနာမှုတွေလည်း ဖြစ်လာတတ်တာပါပဲ။ဆောင်းရာသီကူးချိန်မျိုးမှာ တုပ်ကွေးမိတာ၊ အအေးမိတာတွေ အဖြစ်များတတ်ပါတယ်။ ကျွမ်းကျင်သူတွေ အဆိုအရတော့ ဒီလိုဖျားနာတတ်တာဟာ အပူချိန်ပြောင်းလဲတာထက် ဒီကာလမှာ တချို့ဗိုင်းရပ်စ်တွေ အပေါက်ဖွားများလာတာကြောင့် ဖြစ်တတ်တာလို့ ဆိုကြပါတယ်။

ရာသီဥတု အကူးအပြောင်းမှာ ဖျားနာရတဲ့အကြောင်းရင်း

Rhinovirus နဲ့ coronavirus တို့ဟာ အအေးမိဖျားနာစေတတ်တဲ့ အဓိက ဗိုင်းရပ်စ်နှစ်ကောင်ပဲ ဖြစ်ပါတယ်။ ဒီဗိုင်းရပ်စ်တွေဟာ ရာသီဥတုအကူးအပြောင်းမှာ အများဆုံး ပေါက်ဖွားပွားများလာတတ်တာကြောင့် အအေးမိတဲ့လူတွေလည်း များလာပါတယ်။

ဒါ့အပြင် ကိုယ်ခန္ဓာကလည်း အပူချိန်တစ်ခုနဲ့တစ်ခုမှာ လုပ်ဆောင်ပုံချင်း မတူညီပါဘူး။ ရာသီဥတု ကူးပြောင်းတဲ့အခါမျိုးမှာ ကိုယ်ခန္ဓာက ရာသီဥတုနဲ့အညီ ပြန်လည်ပြုပြင်ယူရတာကြောင့် ဗိုင်းရပ်စ်နဲ့ရောဂါပိုးမွှားတွေ ပိုမိုဝင်ရောက်လွယ်ပါတယ်။

ဆောင်းဝင်လာတဲ့အခါမျိုးမှာ တုပ်ကွေးမိနိုင်ခြေက ပိုများပါတယ်။ တုပ်ကွေးဖြစ်စေတဲ့ influenza virus ဟာ ရာသီဥတုအေးတဲ့အခါ ပိုမိုအသက်ရှင်နိုင်ပြီး ပွားလွယ်တာကြောင့်ပါပဲ။