ပထမဆုံး အသားကြိတ်ထားတာတွေထဲ ကြက်ဥတွေ ဖောက်ထည့်ပေးပါ။အရိုးနုမကြိုက်တဲ့သူတွေတော့ အသားကို ကြိတ်တည်းက အရိုးနုကို ရှောင်ပါနော်။

ပြီးတာနဲ့ ငရုတ်ကောင်း၊ ခနောကြက်သားမှုန့်၊ ပဲငံပြာရည်ကြည်နဲ့ အသားကို နှံ့စပ်နေအောင် နယ်ပေးပါ။ အဲ့ဒီလိုနယ်ပြီးတာနဲ့ ကြက်သွန်ဖြူနဲ့ချင်းကို ကြေညက်အောင် ကြိတ်ပြီး အသားထဲထပ်ထည့်ပေးပါ။ အဲဒီလိုမှ အသားကပိုမွှေးမှာလေ။ အိမ်ကကလေးတွေဖျားနာတာတွေအတွက်လည်း ဓါတ်စာဖြစ်တာပေါ့။

အကုန်နှံ့နေအောင်နယ်ပြီးပြီဆိုတာနဲ့ လျှို့ဝှက်ချက်တစ်ခုက ရေလေး ထမင်းစားဇွန်း ၆ဇွန်းစာလောက် ထည့်ပေးပါ။ ပြီးတာနဲ့ အသားတွေအကုန်လုံးကို နှံ့စပ်နေအောင် မွှေပေးပါ။ ဒီနေရာမှာ နှံ့နှံ့လေး မွှေနိုင်မှ ကြက်အူချောင်းလေးက အရသာရှိမှာနော်။

ကဲ…အားလုံးပြီးပြီဆိုတာနဲ့ သန့်စင်ထားတဲ့ ဝက်အူအခွံပါးပါးကြည်ကြည်ထဲ အသားတွေကို ကန်တော့လေးခံပြီး ဖြည်းဖြည်းချင်း သိပ်ထည့်ပါနော်။ သိပ်ထည့်ပြီးရင်တော့ ကိုယ်ကြိုက်တဲ့အရွယ်အစားအလိုက် အလိမ်လေးတွေကျစ်ပေးပါ။

ပြီးမှ ဆီခပ်အေးအေးထဲ ထည့်ကြော်လိုက်ရင် ကလေးတွေရော၊ အနံ့ရတဲ့ ပတ်ဝန်းကျင်တစ်ခွင်က အိမ်တွေပါ ဝင်လာပြီး စားချင်သွားအောင်ကောင်းတဲ့ အိမ်လုပ်ကြက်အူချောင်းကြော်လေးတွေ ရပြီပေါ့။